ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀଙ୍କ ଜୀବନୀ ଗ୍ରନ୍ଥ ଉନ୍ମୋଚିତ, ଉତ୍ସବରେ ମୁଖ୍ୟମନ୍ତ୍ରୀଙ୍କ ଉପସ୍ଥିତି

ଆଜି ଭୁବନେଶ୍ୱରଠାରେ ପୂଜ୍ୟ ବେଦାନ୍ତ କେଶରୀ ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀଜୀଙ୍କ ଜୀବନୀ ଆଧାରିତ ପୁସ୍ତକ ‘‘ବେଦାନ୍ତ କେଶରୀ ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀ: କୃତି ଓ ବ୍ୟକ୍ତିତ୍ୱ ’’ର ଉନ୍ମୋଚନ ଉତ୍ସବରେ ଯୋଗଦେବାର ସୌଭାଗ୍ୟ ପ୍ରାପ୍ତ ହେଲା । ‘‘ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀ ସ୍ମୃତିନ୍ୟାସ’’ ପକ୍ଷରୁ ପ୍ରକାଶିତ ଏବଂ ଶ୍ରୀ ବିପିନ ବିହାରୀ ନନ୍ଦ ଓ ଶ୍ରୀ ବାଞ୍ଛାନିଧି ପଣ୍ଡାଙ୍କ ଦ୍ୱାରା ରଚିତ ଏହି ଅମୂଲ୍ୟ ଗ୍ରନ୍ଥର ଉନ୍ମୋଚନ ସନ୍ଧ୍ୟାରେ ରାଷ୍ଟ୍ରୀୟ ସ୍ୱୟଂସେବକ ସଂଘର ସାଧାରଣ ସମ୍ପାଦକ ପୂଜନୀୟ ଶ୍ରୀ ଦତ୍ତାତ୍ରେୟ ହୋସବାଲେଜୀ, ପୂଜ୍ୟ ଆଧ୍ୟାତ୍ମିକ ଗୁରୁ ସ୍ୱାମୀ ପରମହଂସ ପ୍ରଜ୍ଞାନାନନ୍ଦଜୀ, ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀ ସ୍ମୃତିନ୍ୟାସର ଅଧ୍ୟକ୍ଷ ପୂଜ୍ୟ ସ୍ୱାମୀ ଜୀବନ ମୁକ୍ତାନନ୍ଦଜୀ, ଆଦରଣୀୟ ଶ୍ରୀ ଧର୍ମେନ୍ଦ୍ର ପ୍ରଧାନଜୀ ଏବଂ ଶ୍ରୀ ମନସୁଖ ଲାଲ ସେଠିଆଜୀଙ୍କ ସମେତ ଗଣ୍ୟମାନ୍ୟ ସାଧୁ-ସନ୍ଥ, ବୁଦ୍ଧିଜୀବୀ ଓ ଶ୍ରଦ୍ଧାଳୁମାନଙ୍କ ଗରିମାମୟ ଉପସ୍ଥିତି ଏହି ପବିତ୍ର ଅବସରକୁ ଅଧିକ ମହିମାମଣ୍ଡିତ କରିଥିଲା । ହିନ୍ଦୁତ୍ୱ କୌଣସି ସଙ୍କୀର୍ଣ୍ଣ ଧର୍ମାନ୍ଧତା ନୁହେଁ; ବରଂ ଏହା ଭାରତର ଆତ୍ମା, ସଂସ୍କୃତି, ମାନବତା, ଦେଶପ୍ରେମ ଏବଂ ସାର୍ବଭୌମତ୍ୱର ଜୀବନ୍ତ ପ୍ରତୀକ । ପୂଜ୍ୟ ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀଜୀ ଥିଲେ ଏହି ଶାଶ୍ୱତ ଚେତନାର ସଚ୍ଚା ପ୍ରହରୀ ।

ପୂଜ୍ୟ ସ୍ୱାମୀଜୀ କେବଳ ଜଣେ ସନ୍ନ୍ୟାସୀ ନଥିଲେ; ସେ ଥିଲେ ସମଗ୍ର ହିନ୍ଦୁ ସମାଜ, ବିଶେଷ କରି ଆମର ଜନଜାତି ଓ ବନବାସୀ ଭାଇଭଉଣୀମାନଙ୍କ ପାଇଁ ସାକ୍ଷାତ୍ ପିତା, ସୁରକ୍ଷା କବଚ ଏବଂ ଜାଗ୍ରତ ଆଧ୍ୟାତ୍ମିକ ଚେତନାର ପୁରୁଷ । ନିଜର ସମଗ୍ର ଜୀବନକୁ ବନବାସୀ ସମାଜର କଲ୍ୟାଣ, ଶିକ୍ଷାର ପ୍ରସାର, ଗୋ-ସଂରକ୍ଷଣ ଏବଂ ସନାତନ ସଂସ୍କୃତିର ସୁରକ୍ଷାରେ ସମର୍ପିତ କରି ସେ ପ୍ରତ୍ୟେକ ଭାରତୀୟଙ୍କ ପାଇଁ ଏକ ଚିରନ୍ତନ ଆଦର୍ଶ ସୃଷ୍ଟି କରିଛନ୍ତି । ସ୍ୱାମୀଜୀଙ୍କ ଅମ୍ଳାନ ସ୍ମୃତି ଓ ଆଦର୍ଶ ପ୍ରତି ଗଭୀର ଶ୍ରଦ୍ଧାଞ୍ଜଳି ସ୍ୱରୂପ ଫୁଲବାଣୀସ୍ଥିତ 'ସରକାରୀ ଭେଷଜ ମହାବିଦ୍ୟାଳୟ ଓ ଚିକିତ୍ସାଳୟ'କୁ ତାଙ୍କ ନାମରେ ନାମିତ କରିବା ସହ ଜଲେଶପଟ୍ଟା ଆଶ୍ରମର ସର୍ବାଙ୍ଗୀନ ବିକାଶ ଓ ଭିତ୍ତିଭୂମି ସୁଦୃଢ଼ୀକରଣ ପାଇଁ ଆମ ସରକାର ଦୃଢ଼ ପଦକ୍ଷେପ ଗ୍ରହଣ କରିଛନ୍ତି । ଆସନ୍ତୁ, ସ୍ୱାମୀଜୀଙ୍କ ଦର୍ଶାଇଥିବା ସେବା, ସଂସ୍କାର ଓ ସଂସ୍କୃତିର ମାର୍ଗରେ ଚାଲି ଏକ ଶସକ୍ତ ଓ ସମୃଦ୍ଧ ସମାଜ ଗଠନ ପାଇଁ ସଂକଳ୍ପବଦ୍ଧ ହେବା ।